广州系一个水资源丰富嘅城市。一向以来，市民有时间就会去撑吓艇仔或者坐船游览珠江，尽情享受水乡乐趣。近年，广州开始发展游艇市场，仅仅旧年一年就新开两家游艇会。目前，广州持有游艇驾驶执照嘅人已经过百，其中三十几人已经有艇在手了。

游艇贵唔贵呢？由百万到过亿都有。你有心玩，就算身家仅有几百万，一样会有款适合你——身家几百万系乜嘢概念？咪就系现金买断一两套房咯。话难？其实都好多人做得到嘎。至于维护费用，虽然都唔平，但买得起鸡，都唔差再买埋豉油啦。所以，私人拥有游艇并唔难，只要市场放开，相信玩家会越来越多。甚至有言论话：游艇唔再系奢侈品，将会走入平常百姓家。

不过，咁嘅言论未免太乐观了。虽然广东水域广阔，但制约游艇发展嘅因素依然唔少。有部分水域，比如万绿湖，虽然风景秀美，但亦系水源地，强调环境保护，对船只制约多多，准入门槛必然高；有啲水域系运输繁忙航线，唔适合放太多游艇，亦无乜观赏价值可言。咁就决定咗：内河可以玩游艇嘅地方有限。

而广阔嘅海洋呢，比如南沙一带，虽然系建立游艇会嘅绝佳地点，但泊位迟早成为问题。目前艇唔多，就话容易解决啫，迟啲会员不断增加，岸线资源亦会僧多粥少。养牌同养泊位，将会成为游艇玩家拦路虎。所以，有心玩嘅人，最好早啲落手啦。